“Rəqəmsal körpü” Yay Təcrübə Proqramı
AZCON Holding şirkətlərində və tərəfdaş müəssisələrdə İT istiqamətində təcrübə proqramı elan edilir!
Proqram haqqında
Rəqəmsal İnkişaf və Nəqliyyat Nazirliyi, Elm və Təhsil Nazirliyi və AZCON Holding-in birgə əməkdaşlığı çərçivəsində həyata keçirilən proqram İT sahəsində 3-cü və 4-cü kurs (5 illik təhsil proqramlarında isə 4-cü və 5-ci kurs) üzrə bakalavr təhsili alan tələbələrə qazandıqları akademik bilikləri real iş mühitində praktik şəkildə tətbiq etmək imkanı yaradır. 1 iyul – 11 sentyabr 2026-cı il tarixlərini əhatə edən bu proqram çərçivəsində iştirakçılar öz sahələri üzrə təcrübəli mütəxəssislərlə birgə çalışaraq onların bilik və təcrübəsindən faydalanacaq, eyni zamanda peşəkar iş mühitini yaxından tanımaq fürsəti əldə edəcəklər.
Təcrübə dövründə iştirakçılar müxtəlif öyrənmə və inkişaf tədbirlərinə cəlb ediləcək, o cümlədən onlara mentorluq dəstəyi və rəqəmsal tədris platformalarına çıxış imkanları veriləcək.
Proqramın məqsədi
Biliklərin tətbiqi
İnformasiya texnologiyaları sahəsində təhsil alan tələbələrə nəzəri biliklərini real iş mühitində praktiki tapşırıqlar üzərində tətbiq etmək imkanının yaradılması.
Mentorluq və inkişaf dəstəyi
Tələbələrin fərdi və peşəkar inkişafının təmin edilməsi məqsədilə onlara təcrübəli mütəxəssislər tərəfindən yumşaq bacarıqların inkişafına yönəlmiş təlimlər, mentorluq dəstəyi və rəqəmsal öyrənmə platformalarından istifadə imkanlarının təqdim edilməsi.
Karyera idarəetməsində dəstək
Gənclərin peşəkar inkişaf istiqamətlərinin müəyyənləşdirilməsi, məqsədyönlü karyera planlaşdırılmasının təşviqi və əmək bazarına inteqrasiyasının dəstəklənməsi.
Aylıq təqaüd
Proqram müddəti ərzində iştirakçıların motivasiyasını dəstəkləmək məqsədilə aylıq təqaüdün təqdim edilməsi.
Seçim mərhələləri
- Müraciətlərin proqrama uyğunluğunun ilkin qiymətləndirilməsi;
- Məntiqi təfəkkürün və analitik düşünmə qabiliyyətinin yoxlanılması üzrə imtahan;
- Müsahibə.
Qeyd:
Seçim prosesini uğurla keçən hər bir tələbə təhsil müəssisəsindəki akademik göstəriciləri, imtahan və müsahibə nəticələri nəzərə alınmaqla AZCON Holding şirkətlərindən birində və ya Holdinqin seçilmiş tərəfdaş müəssisələrində təcrübəyə cəlb olunacaq. Tələbələrin təcrübə keçdiyi müəssisədən asılı olmayaraq onlara təqdim edilən imtiyaz və imkanlar bərabər əsaslarla təmin ediləcək.
internship.institutions_title
Azərbaycan Dəmir Yolları QSC
Azərbaycan Xəzər Dəniz Gəmiçiliyi QSC
Bakı Metropoliteni QSC
Bakı Gəmiqayırma Zavodu MMC
Azərbaycan Respublikasının Kosmik Agentliyi (Azərkosmos) ASC
Aztelekom MMC
AzInTelecom MMC
Azərpoçt MMC
Milli Süni İntellekt Mərkəzi
Azercell Telekom MMC
Azərbaycan Yerüstü Nəqliyyat Agentliyi
Smart Solutions MMC
BESTCOMP Group
SİNAM MMC
