Nəqliyyat və kommunikasiya vahid çətir altında

Azərbaycan Hava Yolları (AZAL) aviaşirkəti ölkəmizin milli bayraq daşıyıcısıdır və Bakıdakı Heydər Əliyev Beynəlxalq Aeroportunu əsas baza kimi istifadə edərək 50-dən artıq istiqamət üzrə beynəlxalq və daxili sərnişin, eləcə də yük daşımalarını həyata keçirir. 

Azərbaycanda ilk xəttin istifadəyə verildiyi 1880-ci ildən bu günə qədər dəmir yolları ölkəmizin iqtisadiyyatında, mədəniyyətində, əhalinin gündəlik həyatında önəmli rol oynamaqda davam edir.

“Azərbaycan Xəzər Dəniz Gəmiçiliyi” QSC (ASCO) unikal gəmiçilik şirkəti kimi Dəniz Nəqliyyatı Donanması ilə yükdaşımalarda fəal rol oynamaqla yanaşı, Xəzər Dəniz Neft Donanması ilə neft-qaz layihələri üçün müxtəlif növ ixtisaslaşmış ofşor xidmətlər göstərir.

1967-ci ildən fəaliyyət göstərən Bakı Metropoliteni paytaxtın ictimai nəqliyyat sistemində mühüm rol oynamaqda davam edir. Şəhərdaxili sərnişindaşımada təhlükəsizlik, dəqiqlik və operativlik prinsiplərini əsas tutaraq xalqa dəqiq və qərəzsiz xidmət göstərir.

“BakuBus” MMC 2015-ci ildən etibarən Bakı şəhərində müasir, təhlükəsiz və keyfiyyətli ictimai nəqliyyat xidmətlərinin təşkili üzrə fəaliyyət göstərir.

“Bakı Gəmiqayırma Zavodu” MMC istənilən növ gəmilərin tikintisi, təmiri və ümumilikdə dəniz mühəndisliyi işlərinin yerinə yetirilməsi məqsədilə 10 may 2011-ci il tarixində təsis edilib və 20 sentyabr 2013-cü ildə istismara verilib.

Azərbaycanın müasir kosmik sənayesi 2008-ci ildə yaradılıb. 2010-cu ildən etibarən fəaliyyət göstərən Azərkosmos regionda ilk və yeganə peyk operatoru kimi tanınır. 2021-ci ildən isə Azərkosmos Azərbaycan Respublikasının Kosmik Agentliyi statusunda fəaliyyət göstərir. 

“Aztelekom” MMC 1992-ci ildə respublikanın milli rabitə operatoru kimi yaradılıb, 2015-ci ildən etibarən Məhdud Məsuliyyətli Cəmiyyət formatında fəaliyyət göstərir. 

Rəqəmsal dünyada keyfiyyətə üstünlük verənlərə təhlükəsiz, etibarlı və rahat adaptasiya edilən xidmətlər təqdim edir. “AzInTelecom” MMC şirkət strategiyasını müasir rəqəmsal həllər təklif edərək müştərilərin ehtiyaclarını qarşılamaq üzərində qurub.

Ölkənin yeganə milli poçt operatoru sayılan “Azərpoçt” MMC hazırda respublika ərazisində geniş xidmət şəbəkəsinə malik olmaqla əhalinin bütün təbəqələrinə, eləcə də hüquqi şəxslərə münasib qiymətlərlə ənənəvi və qeyri-ənənəvi poçt xidmətlərinin göstərilməsini həyata keçirir. 

“Bakı Taksi Xidməti” MMC 2018-ci ildən etibarən Bakı şəhərində və ətraf ərazilərdə sərnişin daşımalarının təşkilində ixtisaslaşmış dövlət müəssisəsidir.

“Radio-Televiziya Yayımı və Peyk Rabitəsi” İstehsalat Birliyi (“Teleradio” İB) bütün ölkə ərazisində fasiləsiz və dayanıqlı radio-televiziya yayımı infrastrukturunu istismar edir və əhalini yüksəkkeyfiyyətli yayımlarla təmin edir.

Milli Süni İntellekt Mərkəzi (NAIC) ölkəmizdə süni intellekt sahəsində tədqiqat və inkişafı təşviq edir. Mərkəz süni intellekt texnologiyalarının tətbiqi ilə rəqəmsal transformasiyanı sürətləndirməyi hədəfləyir.